Մատենդարանի մոտ այսօր` ժամը 20:00-ին, մշակութային ծրագրով հանդես է գալիս լեգենդար ռուս ռոք երաժիշտ և «Կիլիկիա» առագաստանավի մեծ բարեկամ Անդրեյ Մակարևիչը. նրա այս քայլն ուղղված է «Կիլիկիա» առագաստանավի պահպանությանը:

Միջնադարյան հայկական առևտրական «Կիլիկիա» նավը կառուցվել է «Այաս» ակումբի կողմից հնագույն նախագծով, անցել է Եվրոպայով մեկ, եղել է 25 տարբեր երկրների 62 նավահանգիստներում: 11 տարի է տևել նավի շինարարությունը: Նավը դարձել է հայ ազգի միասնականության և հոգևոր ուժի խորհրդանիշը:

Երկու տարի անընդմեջ ճանապարհորդելով` տարբեր երկրների բազմաթիվ մարդիկ իմացել են հայ ժողովրդի ծովագնացության վառ պատմության էջերը:

Արդեն երրորդ տարին է` լեգենդար առագաստանավը բաց երկնքի տակ սպասում է ծովային թանգարանի կազմակերպման հարցին: Միջնադարյան տեխնոլոգիաներով կառուցված առագաստանավը կարիք ունի մշտական խնամքի և համապատասխան պայմանների ապահովման` հետագա գոյությունը պահպանելու համար:

«Այաս» ակումբը մտավախություն ունի, որ մի քանի տարի անց կարող ենք անվերադարձ կորցնել «Կիլիկիա» առագաստանավը:

«Կիլիկիա» առագաստանավի ստեղծողները` «Այաս» ակումբը, նրանց ընկերներն ու համախոհները, ովքեր անտարբեր չեն մշակութային ու պատմական արժեքների նկատմամբ, այս օրերին ձեռնարկում են բոլոր անհրաժեշտ միջոցներն առագաստանավի պահպանության համար: