«Կասպյան էյրլայնս» ավիաընկերության Նալբանդյան փողոցում տեղակայված գրասենյակում մթնոլորտը ծանր էր, հուզիչ:
Այստեղ անընդհատ գալիս էին Թեհրանից Երեւան թռչող Տու 154 ինքնաթիռի զոհերի հարազատները, ճշտում անուններ, չէին դադարում նաեւ հեռախոսազանգերը:
«Զանգահարում են նույնիսկ Ճապոնիայից, Ռուսաստանից, Ռումինայից, Իրանից, տեղեկանում դեպքի մանրամասներին, ճշտում զոհվածների անունները: Մենք էլ շատ հուզված ենք, քանի որ ամեն անգամ շատ դժվար է նույն լուրը հաղորդելը»,- «Ա1+»-ին ասաց «Տաթեվ թրավել» ՏՏՏ ընկերության ավագ դիսպետչեր Բելլա Գեւորգյանը: Թեհրան-Երեւան չվերթի ուղեւորների մեծ մասը պարսկահայեր էին հիմնականում' գործարարներ: Նրանց թվում են «Մարկել» ՓԲԸ ընկերության աշխատակիցներից Արթուր Գրիգորյանը, Աշոտ Ներսիսյանը: Զոհվածների թվում է նաեւ Իրանում Վրաստանի դեսպանի կինը Նաթելա Նիկոլավան եվ Հայաստանում Վրաստանի դեսպանատան ֆինանսական մենեջեր Գիվի Չակադուան:
«Բարեկամներս ու ընկերներս եղել են այդ ինքնաթիռում նրանք բոլորը զոհվել են: Շատ դժվար է այդ ամենի մասին առաջինը տեղեկանալ, սակայն գերադասում եմ մնալ այստեղ շարունակել աշխատանքս»,-«Ա1+»-ին հուզված պատմեց ընկերության մեկ այլ աշխատակցուհի' Լալա Ամիրխանյանը:
Ավիաընկերության գրասենյակ եկած հարազատների մեծ մասը լացակումած հեռանում էին, մի մասն էլ' արդեն տոմսեր պատվիրում Իրան վերադառնալու համար, սակայն եւ այսօր, եւ վաղը դեպի Թեհրան Երեւանից թռիչքների չեն իրականացվելու:
Հայաստանում Իրանի Իսլամական Հանրապետության դեսպանատանը չբացառեցին, որ Իրանում դեպքի կապակցությամբ սուգ հայտարարվի:
Այս պահին առկա տվյալներով Թեհրան- Երեւան չվերթի վթարի ենթարկված ինքնաթիռի ուղեւորներից մոտ քառասունը հայազգի են, որոնցից հինգը'Հայաստանի քաղաքացի:
Կից ներկայացնում ենք ՙԿասպիական ավիաուղիներ՚ ընկերության կայքում տեղադրված վթարի ենթարկված ինքնաթիռի ուղեւորների ցանկը:
Դեպքի վայր են մեկնել Թեհրանում ՀՀ դեսպանության ներկայացուցիչները, վաղը Երեւանից Ղազվին կժամանի Իրանում ՀՀ նորանշանակ դեսպան Գրիգոր Առաքելյանը:
Комментарии (0)
RSS свернуть / развернутьТолько зарегистрированные и авторизованные пользователи могут оставлять комментарии.